Հունվարի 19-ին ՀՀ ՏԿԵ նախարարի տեղակալ Հակոբ Վարդանյանը մասնակցել է Համաշխարհային բանկի Հայաստանի գրասենյակի նախաձեռնած «Երկրի գործընկերության շրջանակի» (ԵԳՇ ՖՏ 19-23) վերանայում՝ ըստ կատարողականի և քաղած դասերի» խորագրով քննարկմանը, որն անցկացվում էր ՀՀ կառավարության հետ համատեղ։
Հանդիպման ընթացքում ներկայացվել են 2019-2023 թվականների ընթացքում նախատեսված և փաստացի կատարված ծրագրերը, անդրադարձ է կատարվել Հայաստանում տիրող տնտեսական իրավիճակին։ Ներկայացվել են նաև Միջազգային ֆինանսական կորպորացիայի (ՄՖԿ) և Բազմակողմ ներդրումների երաշխավորման գործակալության (ԲՆԵԳ) ներգրավվածության շրջանակներում Հայաստանում իրականացված ծրագրերը․
Երևանում 250 ՄՎ հզորությամբ կանաչ էներգաարտադրության և համակցված ցիկլով գազատուրբինային էներգակայանի ստեղծման փաթեթ,
18 միլիոն ԱՄՆ դոլար ֆինանսավորում 55 ՄՎ հզորությամբ արևային ՖՎ կայանի համար,
60 միլիոն ԱՄՆ դոլար արժեքով երկարաժամկետ ֆինանսավորում էլեկտրականության բաշխման ցանցերի արդիականացման համար։
Քննարկվել են նաև COVID-19 համավարակի առողջական, սոցիալական և տնտեսական հետևանքներին, ներդրումային միջավայրում ռիսկերի նվազեցմանը, մրցակցության բարձրացմանը, ինչպես նաև բնապահպանական և ժողովրդագրական մի շարք խնդիրներին և դրանց հնարավոր լուծումներին վերաբերող հարցեր։
