Շուկայում ձվի գնի բարձրացման մի շարք հանգամանքներ պարզելու նպատակով տնտեսական մրցակցության պաշտպանության պետական հանձնաժողովը մարտի 30-ին վարույթ կհարուցի, այս մասին հայտնել է ՏՄՊՊՀ նախագահ Գեղամ Գևորգյանը։
«Վաղը վարույթ կհարուցվի ձվի շուկայի խոշոր տնտեսավարողների հետ կապված՝ պարզելու մի շարք հանգամանքներ․ արդյոք դիֆիցիտը արհեստակա՞ն է, արդյոք միջնորդ կազմակերպություննե՞րն են այդ արհեստական դիֆիցիտը ստեղծում, արդյոք կա՞ հակամրցակցային համաձայնություն, թե կա գերիշխող դիրքի չարաշահում և արդյոք գնային բարձրացումները օբյեկտի՞վ են։ Եթե պատասխաններից որևէ մեկը դրական կլինի, բնականաբար, տնտեսավարողները պատասխանատվություն կկրեն»,- ասաց Գևորգյանը։
ՏՄՊՊՀ նախագահը նշել է նաեւ, որ կան անձինք, որոնք խոշոր ծավալի գնումներ են կատարում և սպառողական նպատակի համար չեն իրականացնում։
«Իհարկե, որոշակի միջոցառումներ իրականացվել են, հանդիպել ենք առևտրային ցանցերի, տեսչական մարմինների, թռչնաբույծների միության ներկայացուցիչների հետ։ Մենք ներքին քննարկումների արդյունքում եկել ենք պայմնավորվածության, որ ձվի գինը կիջնի»,- նշել է Գևորգյանը՝ տեղեկացնելով, որ արդեն շուկայում ձվի գինն իջնում է։
