Հունիսի 20-ին արտահերթ խորհրդարանական ընտրությունները կյանքի կոչելու համար ՀՀ վարչապետ Նիկոլ Փաշինյանը այսօր հրաժարական տվեց։
«Կարևոր համարեցի, որ հրաժարականը տեղի ունենա հենց այսօր՝ քաղաքացու օրը։ Սա կարևոր խորհրդանիշն է այն բանի, որ այսպիսով ՀՀ քաղաքացուց ստացած իշխանությունը մենք վերադարձնում ենք քաղաքցուն, որպեսզի նա որոշի իշխանության հետագա ճակատագիրը՝ ազատ, արդար ընտրություններով»,- ուղերձով դիմելով ՀՀ քաղաքացիներին հայտարարեց վարչապետ Նիկոլ Փաշինյանը։
Փաշինյանը հիշեցրեց, որ դեռեւս մարտի 18-ին Հանրապետության նախագահի, խորհրդարանական խմբակցությունների ղեկավարների հետ քննարկումների արդյունքներով հայտարարել է հունիսի 20-ին Հայաստանում արտահերթ խորհրդարանական ընտրություններ անցկացնելու որոշման մասին։
ՀՀ գործող Սահմանադրությամբ արտահերթ խորհրդարանական ընտրությունների անցկացումը հնարավոր է այն դեպքում, երբ վարչապետը հրաժարական է տալիս, և խորհրդարանը 2 անգամ վարչապետ չի ընտրում։ Դրանից հետո Ազգային ժողովն իրավունքի ուժով համարվում է արձակված, և տեղի են ունենում արտահերթ խորհրդարանական ընտրություններ։
Նիկոլ Փաշինյանը նշել է, որ այս ընթացքում կշարունակի կատարել ՀՀ վարչապետի պարտկանությունները՝ օրենսդրությամբ ու սահմանադրությամբ նախատեսված ամբողջ ծավալով։