Ֆուտբոլի միջազգային ֆեդերացիայի նախագահ Ջանի Ինֆանտինոն հայտարարություն է արել Սուպերլիգայի ստեղծման մասին:
«Ես երկար և ջանասեր աշխատանք եմ տարել եվրոպական ֆուտբոլի արժեքների պահպման համար: Սակայն հիմա տեսնում ենք, որ ոմանք դրանք դուրս են նետում` կարճաժամկետ եկամտաբերության համար»,- ՖԻՖԱ-ի նախագահի խոսքերը փոխանցել է ֆեդերացիայի մամուլի ծառայությունը:
Հիշեցնենք, որ ֆուտբոլային եվրոպական 12 ակումբ համաձայնության են եկել Սուպերլիգա ստեղծելու գաղափարի շուրջ: Սուպերլիգան 20 թիմից կազմված մրցաշար է լինելու, որոնցից 15-ը կլինեն անփոխարինելի ակումբներ: Մյուս 5 թիմերը իրավունք կստանան մասնակցելու մրցաշարին՝ հաղթահարելով որակավորման փուլը: Հիմնադիրները «Ռեալ», «Յուվենտուս», «Մանչեսթեր Յունայթեդ», «Բարսելոնա», «Ատլետիկո», «Միլան», «Ինտեր», «Մանչեսթեր Սիթի», «Լիվերպուլ», «Արսենալ», «Չելսի» և «Տոտենհեմ» ակումբներն են:
Սուպերլիգայի նախաձեռնողներն են Մադրիդի «Ռեալի» նախագահ Ֆլորենտինո Պերեսը, «Յուվենտուսի» նախագահ Անդրեա Անյելին և «Մանչեսթեր Յունայթեդի» սեփականատերեր Գլեյզեր եղբայրները: Մասնակից ակումբները նախնական կստանան 89-310 միլիոն եվրո: