Ադրբեջանը 2020 թ. նոյեմբերի 10-ին Ղարաբաղի հարցով եռակողմ համաձայնագրի ստորագրումից հետո բոլոր ռազմագերիներին փոխանցել է Հայաստանին, իսկ ռազմական գործողությունների ավարտից հետո ձերբակալված անձինք այդպիսին չեն համարվում և պատասխան կտան օրենքի առաջ: Նման մեկնաբանություն են տվել «ՌԻԱ Նովոստի»-ին Ադրբեջանի ԱԳՆ-ից:
Ադրբեջանի նախագահն ու ԱԳՆ ղեկավարն ավելի վաղ հայտարարել էին, որ Հայաստանին հանձնել են Ղարաբաղում ռազմական գործողությունների ընթացքում գերեվարված բոլոր ռազմագերիներին: Դրան հաջորդել էր ՀՀ ԱԳՆ-ի արձագանքը. հայկական դիվանագիտական գերատեսչության մամուլի քարտուղար Աննա Նաղդալյանն անհամաձայնություն էր հայտնել Բաքվի հայտարարությանը:
«Անձինք, որոնք եռակողմ հայտարարության ստորագրումից հետո ահաբեկչական և դիվերսիոն գործողություններ իրականացնելու նպատակով Հայաստանի կողմից ուղարկվել էին Ադրբեջանի տարածք՝ միջազգային մարդասիրական իրավունքի համաձայն, չեն համարվում և չեն կարող համարվել ռազմագերիներ: Ձերբակալվածները պատասխանատվություն են կրում Ադրբեջանի Հանրապետության Քրեական օրենսգրքի համաձայն: Եվս մեկ անգամ ընդգծում ենք, որ Ադրբեջանը վերադարձրել է բոլոր ձերբակալվածներին, որոնք համարվում են ռազմագերիներ», – նշել են ԱԳՆ մամուլի ծառայությունից: