Վրաստանի վարչապետ Իրակլի Ղարիբաշվիլին հանիպել է Եվրոպական խորհրդի ղեկավարի ներկայացուցիչ Քրիստիան Դանիելսոնի հետ և հայտարարել ընդդիմության հետ կառուցողական երկխոսության պատրաստակամության մասին: Ըստ վարչապետի դա անհրաժեշտ է երկրում հնարավոր քաղաքական ճգնաժամը շուտափույթ լուծելու համար, հայտնում է Վրաստանի կառավարության մամուլի ծառայությունը:
«Մենք վերահաստատում ենք կառուցողական երկխոսության մեր պատրաստակամությունը՝ հնարավորինս շուտ [ընդդիմության հետ] համապատասխան համաձայնագիր ձևակերպելու համար», – ասել է նա:
Ղարիբաշվիլին շնորհակալություն է հայտնել Եվրոպական խորհրդի ղեկավար Շառլ Միշելին և նրա ներկայացուցիչ Դանիելսոնին քաղաքական ճգնաժամի կարգավորման հարցում ցուցաբերած օգնության համար:
Վրաստանում քաղաքական ճգնաժամը շարունակվում է արդեն հինգ ամիս: 2020 թվականի նոյեմբերին ընդդիմությունը հրաժարվել է ճանաչել աշնանային խորհրդարանական ընտրությունների արդյունքները՝ մեղադրելով իշխանություններին քվեարկության արդյունքները կեղծելու համար: Մինչ այժմ իշխանությունների հակառակորդների մեծ մասը հրաժարվում է աշխատել նոր խորհրդարանում: Իրավիճակն ավելի է վատացել փետրվարի 23-ին, երբ ոստիկանությունը ձերբակալել է ընդդիմադիր «Միացյալ ազգային շարժում» կուսակցության նախագահ Նիկա Մելիային: Այդ օրվանից սկսած ընդդիմությունը բողոքի ցույցեր է կազմակերպում:
