Ադրբեջանի պաշտպանության նախարարությունը հերքել է ՌԴ ՊՆ-ի տարածած հայտարարությունը, ըստ որի՝ բանակցություններից հետո ադրբեջանական կողմը հետ է քաշել իր ստորաբաժանումները Փառուխ գյուղի շրջակայքից:
«Ադրբեջանական բանակի զորքերի դուրսբերման մասին տեղեկատվությունն այդ դիրքերից չի համապատասխանում իրականությանը։ Մեր բանակն ամբողջությամբ վերահսկում է օպերատիվ իրավիճակը»,- նշված է Ադրբեջանի ՊՆ հայտարարությունում:
Ադրբեջանի ՊՆ-ն ապատեղեկատվություն է համարել նաև Ռուսաստանի պաշտպանության նախարարության հայտարարությունն այն մասին, ըստ որի՝ հրադադարը խախտել է ադրբեջանակն կողմը:
«Ցանկանում ենք եւս մեկ անգամ հիշեցնել, որ Ադրբեջանում «Լեռնային Ղարաբաղ» անվանումով վարչատարածքային միավոր չկա: ՌԴ պաշտպանության նախարարության հայտարարություններում այս տերմինի օգտագործումը անհարգալից վերաբերմունք է միջազգային հանրության, այդ թվում՝ Ռուսաստանի Դաշնության կողմից ճանաչված և ընդունված Ադրբեջանի տարածքային ամբողջականության նկատմամբ»,- նշել են Ադրբեջանի ՊՆ-ից:
