ԱՄՆ-ի նախագահ Ջո Բայդենը երկուշաբթի օրն ասել է, թե քննարկում է բենզինի հարկի հետ կապված ժամանակավոր դադար հաստատելու հարցը, որը ամերիկացիների համար հավանաբար կնշանակի մոտ հինգ սենթի խնայողություն յուրաքանչյուր մեկ լիտրի դիմաց։ Այս մասին հայտնում է Ամերիկայի ձայնը:
Լրագրողի հարցին, թե նախագահը մտածում է արդյոք գազի դաշնային հարկի դադարի մասին, Բայդենը տվել է դրական պատասխան. «Այո, ես դիտարկում եմ դա»:
Իսկ, թե որքան շուտ կարող են ամերիկացիները դա ակնկալել, ԱՄՆ-ի նախագահն ասել է, թե հույս ունի, որ այն տեղի կունենա մինչեւ այս շաբաթվա վերջ:
Բայդենն ասել է նաև, որ իր թիմը պատրաստվում է այս շաբաթ հանդիպում ունենալ խոշոր նավթային ընկերությունների գործադիր տնօրենների հետ՝ լսելու բացատրություններ այն մասին, թե ինչպես են նրանք արդարացնում առաջին եռամսյակի ընթացքում 35 միլիարդ դոլար վաստակելու փաստը:
Բայդենի խոսքով, խնդիրներից մեկն այն է, որ նավթային ընկերությունները կրճատել են վերամշակման ծավալները:
