Ազգային ժողով-կառավարություն հարց ու պատասխանի ժամանակ ՀՀ պաշտպանության նախարարի պաշտոնակատար Վաղարշակ Հարությունյանն անդրադարձել է սահմանային խնդիրենրի թեմային։ Նա նշեց, որ ուզում է ընդհանրապես անդրադառնալ այս հարցերին, որոնք մշտապես բարձրացվում են։
«Ես ձեզ ուզում եմ հստակ ասել, որ այն սահմանը, որը նախատեսված է Սովետական միության և ճանաչված անկախ Հայաստանի, այն ամբողջովին պահպանվում է։ Հիմա ես կարող եմ ասել՝ կան տեղեր, որ մերոնք 50 մետր առաջ են։ Կան տեղեր, որ հակառակը։ Այստեղ պայմանավորված է նաև այն հանգամանքով, որ դիրքը հնարավոր չէ դնել այնպիսի տեղ, որն ապահովի անվտանգությունը և վերահսկողությունը։ Եվ այդ հարցից ելնելով՝ դիրքերն առաջ ու հետ են գնում։ Բայց ուզում եմ ասել, որ այդ սահմանային փոփոխությունները, որոնք տեղի են ունեցել, կազմում են շատ փոքր քանակ, և այս հարցերը պետք է լուծվեն դեմարկացիայի ժամանակ»,- ասաց Վաղարշակ Հարությունյանը։
