Այսօր՝ մայիսի 30-ին, Արարատ քաղաքի մշակույթի և արվեստի կենտրոնի մեծ դահլիճում տեղի ունեցավ Արարատ քաղաքի Ղազարոս Սարյանի անվան արվեստի դպրոցի 60-ամյակին նվիրված համերգային միջոցառում։
Սարյանի արվեստի դպրոցում կա մեծ երաժշտական բաժին. գործում են դաշնամուրի, լարային, փողային, ժող գործիքների, երգեցողության դասարաններ: Դպրոցի սաները մասնակցել են «Նոր անուններ», «Վերածնունդ» ու բազմաթիվ այլ մրցույթների և փառատոների, գրավել պատվավոր տեղեր: Դպրոցն ունի նաև Վ.Սպիվակովի անվան միջազգային բարեգործական հիմնադրամի կրթաթոշակառու։
Երաժշտականից բացի դպրոցում կա նաև գեղարվեստի բաժին, որտեղ հիմքը նկարչությունն է, իր առարկաներով՝ գունանկար, գծանկար, կոմպոզիցիա: Դպրոց մուտք գործելուց անհնար է չնկատել գեղեցիկ նախշերով զարդարված պատերը, դռները: Նեղ միջանցքում տեղակայված լսարանների դռներին պատկերված են թեմատիկ նկարներ։ Գրադարանի դռանը պատկերված է գիրք ընթերցող աղջիկ, ժող գործիքների դռան վրա՝ թառ նվագող տղամարդ, և այս ամենը ստեղծագործել են դպրոցի սաները:
Դպրոցն իր 60-ամյա պատմության ընթացքում տվել է բազմաթիվ շրջանավարտներ, որոնցից շատերը հայտնի երաժիշտներ են դարձել և այժմ աշխատում են հանրապետության տարբեր երաժշտական հաստատություններում, ոմանք էլ կայացել են գիտության տարբեր բնագավառներում՝ ստանալով գիտական բարձր կոչումներ:
Հեղինակ՝ Լիլիթ Պետրոսյան
