Այսօր՝ հուլիսի 13-ին, Արտակարգ իրավիճակների նախարարը հրատապ խորհրդակցություն է հրավիրել՝ եղանակի կտրուկ տաքացմանը զուգահեռ՝ հրդեհների առաջացման վտանգի ավելացման հարցով։
Գերատեսչության ստորաբաժանումների ղեկավարները նախարարին զեկուցել են այս պահին տիրող իրավիճակի մասին, ներկայացրել իրականացվող աշխատանքները կանխարգելելու հրդեհների առաջացումը և այն գործիքակազմը, որով հարկ եղած դեպքում կիրականացվի հրդեհաշիջում:
Ըստ զեկույցների, հանրապետության բոլոր ՀՓՋ-ները տեխնիկապես պատրաստ են և հագեցած իրականացնելու հրդեհաշիջման աշխատանքներ: Անհրաժեշտության դեպքում հրդեհաշիջման աշխատանքներին կներգրավվեն նաև ուղղաթիռներ. էլեկտրոնային եղանակով հավաքագրվել և հասցեագրվել են հանրապետության տարածքում առկա ջրային ավազանները, որտեղից հնարավոր կլինի օգտվել: Անօդաչու թռչող սարքերով շարունակվում է իրականացվել մշտադիտարկում և բնակչության իրազեկում:
ԱԻ նախարարը հանձնարարել է այս օրերին առավել սերտ գործակցել Շրջակա միջավայրի նախարարության, մարզպետարանների, համայնքների հետ՝ իրականացնելով ուժեղացված ծառայություն անտառտնտեսություններում, արգելոցների և այլ խոտածածկ ու բուսածածկ տարածքներում: Նախարար Արմեն Փամբուխչյանը հանձնարարել է հատուկ ուշադրություն և կարևորություն տալ քաղաքացիների հետ տարվող իրազեկման աշխատանքներին։
