Ամբողջ աշխարհը ոտքի է ելել,
Ամբողջ աշխարհը քեզ հետ է հիմա,
Եվ քեզ համար է, մոռացված իմ ազգ,
Արար աշխարհը իր սիրտը բացել,
Ու քեզ է մեկնել ձեռքերը ահա…
Աշխարհահռչակ Շանսոնիեի և Մեծ հայի խոսքերն են, ով իր վառ ու անհատական կերպարով և բացառիկ նվիրվածությամբ մշտապես իր ազգի կողքին էր։ Լեգենդար հային սիրում ու մեծարում է ամբողջ աշխարհը։ Նրա ստեղծագործությունները շարունակում են հնչել ու հիացնել։ Ազնավուրի ծննդյան օրն այսօր նշանավորվեց Արտաշատի` նրա անունը կրող մշակույթի տանը գեղեցիկ միջոցառմամբ։
Արտաշատ համայնքի ղեկավարի տեղակալ Սուրեն Մկրտչյանը և համայնքապետարանի աշխատակիցները ծաղիկներ խոնարհեցին երգչի կիսանդրու մոտ։ Հնչեցին ազնվուրյան գեղեցիկ ու հուզիչ երգերը։
Արտաշատի բնակիչների համար պատիվ ու հպարտություն է, որ աշխարհահռչակ Շանսիոնեն հեռավոր 90-ականներին անձամբ է ներկա գտնվել կենտրոնի անվանակոչության արարողությանը, կտրել կարմիր ժապավենը և իր ստորագրությունը թողել աշխատասենյակներից մեկի պատին։ Հեռավոր այդ օրը շունչ էր առել ներկայացված լուսանկարներով։ Ներկայացվեցին նաև պարային ու երգի գեղեցիկ համարներ` ազնավուրյան խորը ու չխամրող փիլիսոփայությամբ։ Շնորհավոր ծնունդդ, մեծ ու լուսավոր Հայ։ Դու հավերժ մեզ հետ ես։
Հեղինակ ` Գեղեցիկ Բալեյան