«Արցախի ապագայի բանալին Արցախի ժողովրդի ձեռքին է». հայտարարել է ՀՀ երկրորդ նախագահ Ռոբերտ Քոչարյանը։
Իրականում Արցախի ապագայի բանալին Ռոբերտ Քոչարյանը Արցախի ժողովրդի ձեռքից խլել է դեռևս 1998 թվականին, երբ Արցախին դուրս մղեց բանակցային գործընթացից։
Այդ ժամանակից սկսած՝ Ռոբերտ Քոչարյանը Արցախի ապագայի բանալիով բացել է բացառապես միայն իր ապագայի դռները։ 20 տարի շարունակ Քոչարյանը՝ Արցախի ապագայի բանալիով կառուցել է իր քաղաքական կարիերան, իր տնտեսական և ֆինանսական կայսրությունը, որի տակ էլ թաղել է Արցախի ապագան։
Ռոբերտ Քոչարյանը խլել է ոչ միայն ապագայի բանալին, այլև այդ բանալիով փակել է Հայաստանի և Արցախի համար տնտեսական մեծ հնարավորությունների լավագույն տարիները։ Իր պաշտոնավարման 10 տարիների ընթացքում, նա համեմատաբար կայուն աշխարհակարգի ժամանակ Արցախի ապագայի բանալին օգտագործեց ոչ թե Արցախի և արցախահայության ապագան կառուցելու և այն ավելի հզոր ու անվտանգ դարձնելու համար, այլ հակառակը, օգտագործեց այն բացառապես իր նեղ անձնական շահերի համար։
Հիմա Քոչարյանը խոսում է ապագայի բանալին Արցախի ժողովրդի ձեռքում գտնվելու մասին։ Քոչարյանը բանալին պետք է փնտրի արդեն այլոց գրպաններում, եթե իհարկե հիշի, թե կոնկրետ ում է այն փոխանցել՝ հանուն իր հարստության և քաղաքական առաջընթացի։
Մկրտիչ Իսրայելյան
