Ադրբեջանի ԱԳՆ ղեկավար Ջեյհուն Բայրամովը մի քանի օր առաջ հայտարարել էր, որ Ադրբեջանը Հայաստանին է ներկայացրել հարաբերությունների կարգավորման վերաբերյալ 5 կետից բաղկացած նոր առաջարկ։ Բաքուն մանրամասնել է ներկայացված 5 կետերը, դրանք են տարածքային ամբողջականության, միջազգային սահմանների անձեռմխելիության փոխադարձ ճանաչում, միմյանց նկատմամբ տարածքային պահանջների բացակայություն, պետական սահմանի սահմանազատում եւ սահմանագծում տրասնպորտային հաղորդակցությունների բացում:
Ադրբեջանի առաջարկներին պատասխանել է Հայաստանի արտաքին գործերի նախարարությունը: Այդ հայտարարությամբ Երեւանն ըստ էության չի մերժում Բաքվի առաջարկները, սակայն հղում կատարելով ՄԱԿ կանոնադրության, Քաղաքական և քաղաքացիական իրավունքների միջազգային դաշնագրին և Հելսինկիի Եզրափակիչ ակտին Հայաստանը հիշեցնում է, որ չի պատրաստվում անտեսել ազգերի ինքնորոշման իրավունքի մասին միջազգային փաստաթղթերի դրույթները և ապագա բանակցություններում կողմնորոշվել միայն տարածքային ամբողջականության սկզբունքով։ Հաշվի առնելով միջազգային այս սկզբունքները Հայաստանը նախատեսում է խաղաղ կարգավորման գործընթացը տեղափոխել միջազգային հարթակ և որպես միջնորդ ներգրավել Մինսկի խմբին։
Հատկանշական է, որ Բաքուն առաջարկները ներկայացնելուն զուգահեռ փորձ արեց դրանց շուրջ ձեւավորել նաեւ սպառնալիքի մթնոլորտ: Արդեն մի քանի օր Արդբեջանը տարբեր սադրանքներ է իրականացնում շփման գծում և բացի այդ ուղղակի էներգետիկ բլոկադայի մեջ է պահում Արցախը: Այս քայլով Բաքուն ըստ էության փորձում է պարտադրել սեփական առաջարկները Երեւանին իր պայմաններով եւ առանց միջազգային կառույցների ներգրավմամբ: Այս ճնշումներին զուգահեռ Ադրբեջանը նաեւ տեղեկատվական դաշտում շարունակում է կեղծ լուրեր տարածել նպատակ ունենալով խուճապ առաջացնել Արցախի բնակչության շրջանում:
Եւս մեկ հատկանշական փաստ: Ալիեւի վարչակազմը սահմանային սադրանքները, էներգետիկ բլոկադան եւ հակամարտության կարգավորման վերաբերյալ առաջարկները ներկայացրեց Հայաստանի եւ Թուրքիայի արտաքին գործերի նախարարների հանդիպման ֆոնին: Այսպիսով Բաքուն կամ խանդի հերթական դրսեւորումն է ցուցադրում հայ-թուրքական հարաբերությունների կարգավորման գործընթացի նկատմամբ, կամ գուցե զգուշացնում է Անկարային, որ չի ընդունի իրեն շրջանցող որեւէ գործընթաց:
