Հանրահայտ ռոք երգերը՝ երևանյան բեմում:
Հունիսի 8-ին Կարեն Դեմիրճյանի անվան մարզահամերգային համալիրում կայացավ «Սիմֆոնիկ ռոք» համերգային ծրագիրը, որի ընթացքում Հայաստանի պետական սիմֆոնիկ նվագախումբը կատարեց սիրված ռոք երգերը՝ դասական հնչողությամբ:
Համերգը սպասված էր հանրության կողմից. դա էր փաստում լեփ-լեցուն դահլիճը. հանդիսատեսի շարքում էին ոչ միայն հայ, այլև այլազգի ունկնդիրներ:
Հայաստանի պետական սիմֆոնիկ նվագախումբը կատարեց համաշխարհային ռոք խմբեր Rammstein-ի, SOAD-ի, Led Zeppelin-ի, Scorpions-ի, The Beatles-ի, Pink Floyd-ի, Deep Purple-ի, Queen-ի հայտնի երգերը: Մենակատարը կիթառահար Վարդան Գաբոյանն էր:
Համերգը ղեկավարում էր դիրիժոր Հարություն Արզումանյանը, ով Azdagir.am-ի հետ զրույցում նշեց. «Առաջին փակ համերգից հետո հաճախ հարցնում էին՝ երբ ենք լսելու մեր սիրելի խմբերի ամենապոպուլյար երգերը: Փորձերի ժամանակ գիտակցեցինք, որ բավականին դժվար է սիմֆոնիկի ու ռոք գործիքների բալանսը գտնել: Մեծ մասամբ մշակումներն արել են Մարտին Ուլիխանյանն ու Կարեն Անանյանը»:
«Սիմֆոնիկ ռոք» համերգային ծրագիրը ստեղծվել է «Գալաքսի» ընկերությունների խմբի և Հայաստանի պետական սիմֆոնիկ նվագախմբի գործակցության արդյունքում և առաջին անգամ ներկայացվել է «Գալաքսի» ընկերությունների խմբի տարեդարձին:
Եզրափակիչ հատվածում` ի պատասխան հանդիսատեսի բուռն ծափահարությունների նվագախումբը կատարեց նաև Queen-ի «Show must go on» ստեղծագործությունը:
Հեղինակ՝ Ալինա Ստեփանյան