ՀՀ վաստակավոր նկարիչ Վլադիմիր Աբրահամյանի 80-ամյա հոբելյանի առթիվ նոյեմբերի 16-ին Հայաստանի նկարիչների միությունում բացվեց հեղինակի ցուցահանդեսը։ Ներկայացված են նկարչի բոլոր ժամանակների ստեղծագործությունները՝ ժանրային բազմազանությամբ ու հարուստ ներկապնակով:
«Նա գեղանկարիչ էր, որն ամբողջ կյանքում հավատարիմ մնաց իր կոչմանն ու արվեստին, եղավ արդար»,-Վլադիմիրի Աբրահամյանի մասին ասել է նկարիչների միության նախագահ Սուրեն Սաֆարյանը: Սուրեն Սաֆարյանը ցավով նշեց, որ Աբրահամյանը ֆիզիկապես ներկա չէ, սակայն ներկա է իր ջերմ, գունեղ ստեղծագործություններով:
Ցուցահանդեսին ներկա էին Վլադիմիր Աբրահամյանի ընտանիքի անդամները, հարազատները, ընկերներն ու գործընկերները, արվեստասերներն ու ուսանողները:
Հոբելյանական ցուցադրությունը նախաձեռնել է Աբրահամյանի ընտանիքը: Ցուցահանդեսին մասնակի ֆինանսական աջակցություն է ցուցաբերել ՀՀ ԿԳՄՍ նախարարությունը:
Նկարչի յուրօրինակ ստեղծագործությունները պահվում են Հայաստանի ազգային պատկերասրահում, տարբեր թանգարաններում, անհատական հավաքածուներում (ԱՄՆ, Ֆրանսիա Լիբանան, Արաբական Միացյալ Էմիրություններ, Լեհաստան, Գերմանիա, Չինաստան, Ռուսաստան):
