«Դիմադրության շարժում»-ը նոյեմբերի 5-ին, ժամը 15:00-ին Ֆրանսիայի հրապարակում հանրահավաք կանցկացնի: Այս մասին մամուլի ասուլիսի ժամանակ հայտարարեց ՀՅԴ ԳՄ ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը: Նա նշել է, որ նոյեմբերի 5-ի հանրահավաքը լինելու է միասնության հանրահավաք. այն լինելու է ոչ թե որևէ անձի, կուսակցության շուրջ, այլ Արցախի ինքնիշխանության, Հայաստանի տարածքային ամբողջականության և անվտանգության շուրջ:
«Դա հայ ժողովրդի հանրահավաքն է, հետևաբար, ՀՀ քաղաքացին, մասնակցելով այդ կարևոր իրադարձությանը, պետք է արձանագրի, որ տեր է իր հայրենիքին և այդ հայրենիքը սակարկման ենթակա չէ»,-ասաց նա:
Պատգամավորն ավելացրեց նաև, որ նոյեմբերի 5-ի հանրահավաքը քաղաքական և կուսակցական հանրահավաք չի լինելու, դա համազգային հանրահավաք է՝ հանուն Արցախի և հանուն Հայաստանի:
«Ես ուզում եմ դիմել Կաթողիկոսին՝ ակնկալելով իր օրհնությունը և աջակցությունը այդ շատ կարևոր նախաձեռնությանը, քանի որ դա կուսակցական հանրահավաք չէ, դա հայ մարդու հանրահավաքն է՝ հայկական օրակարգով: Դիմում եմ մեր մտավորականությանը, գիտական համայնքին, որպեսզի հայ ժողովրդի համար այս ճակատագրական պահին հանդես գան հանրահավաքին մասնակցելու կոչով՝ ցույց տալով իրենց կամքն ու տեսակետը»,-ասաց նա: