Առողջապահության նախարարի պաշտոնակատար Անահիտ Ավանեսյանը կառավարության այսօրվա նիստում անդրադառնալով համավարակային իրավիճակին տեղեկացրեց, որ երեկ կատարվել է 5093 թեստավորում, գրանցվել է կորոնավիրուսի 186 նոր դրական դեպք։
«Իհարկե ավելի մեծ թվով թեստավորում՝ է երեկ իրականացվել։ Մենք նկատում ենք թվերի մի փոքր աճ և վերարտադրության ցուցանիշի աճ, ինչը մեզ ևս մեկ անգամ կարմիր լույսով զգուշացնում է, որ պետք է մեծ ուշադրություն դարձնենք պատվաստումների գործընթացը արագացնելու վրա»,- ասաց Ավանեսյանը։
Նախարարի պաշտոնակատարի խոսքով այսօրվա դրությամբ արդեն 97 711 պատվաստում է իրականացվել, միայն երեկ գրանցվել է 5416 պատվաստում, որը բավական լավ ցուցանիշ է։
«Եվ մենք այս աճի տեմպը պետք է պահպանենք։ Եթե երկու-երեք շաբաթ առաջ մենք մինչև 2000 պատվաստում էինք իրականացնում, ապա արդեն նկատելի է աճի տեմպը։ Եվ այս տեմպը շարունակելով՝ մենք պետք է պատվաստումային ցուցանիշների առումով հստակ մեր ճիշտ դիրքն ունենանք տարածաշրջանում»,- նշեց Ավանեսյանը։ Նրա խոսքով քաղաքացիների մոտ պատվաստումների նկատմամբ վստահության մեծացում կա։ Հանրապետությունում առկա երեք տեսակի պատվաստանյութերն էլ բաց են բոլոր քաղաքացիների համար, մարդիկ կարող են ընտրել, թե որ պատվաստանյութով են ուզում պատվաստվել։ Աշխատանքներ են տարվում այլ պատվաստանյութեր Հայաստան ներկրելու համար։
Վարչապետի պաշտոնակատար Նիկոլ Փաշինյանն ասաց, որ երեկ գրանցվել է մեկօրյա պատվաստման ռեկորդային ցուցանիշ, ինչը կարևոր է։
«Ուզում եմ ասել, որ երբ մենք առաջին անգամ խորհրդակցություն ենք արել այս թեմայով, ասել ենք, որ նպատակ ունենք հասնել օրը 3000 ցուցանիշի։ Բայց մենք այդ 3000-ը շատ արագ հասանք, հիմա 5000-ը հատել ենք։ Եվ ես ուզում եմ պայմանավորվենք, որ այս ցուցանիշը չպետք է նվազի, առնվազն նույն մակարդակով պետք է մնա»,- ասաց Փաշինյանը։
