Աջափնյակում փակվեց վերջին աղբամուղը. Երևանի աղբամուղերի ավելի քան 60%-ն արդեն իսկ փակվել է։ Այս մասին տեղեկացնում են Երեւանի քաղաքապետարանից։
2020թ.-ից մայրաքաղաքի վարչական շրջաններում համակարգված մեկնարկեց բազմահարկ բնակելի շենքերի աղբամուղերի փակման գործընթացը: Համայնքային իշխանության, համատիրությունների ու բնակիչների համագործակցությամբ իրականացվող ծրագիրը լայն թափ ստացավ այս տարի:
«Աղբամուղերի փակումն այլընտրանք չունի, մարդկային նորմալ կյանքի որակի խախտում կա այդտեղ: Պետք է մեր վարչական շրջանների ղեկավարներն իրենց ղեկավարությամբ ամեն ինչ անեն, որպեսզի այդ աղբամուղերը փակվեն, իհարկե օրենքի սահմաններում»,- նշել է քաղաքապետ Հայկ Մարությանը:
Աջափնյակն առաջինն է Երևանի վարչական շրջաններից, որտեղ ծրագիրն ամբողջությամբ կատարվեց: Օրերս զոդվեցին վերջին երկու աղբամուղերը:
