Ուկրաինայի նախագահ Վլադիմիր Զելենսկին երեքշաբթի օրը հայտարարել է, որ հրադադարի շուրջ բանակցություններ վարելու պայմանը ռուսական կողմի կողմից ուկրաինական քաղաքների և բնակավայրերի ռմբակոծությունների և հրետակոծությունների դադարեցումն է։
Զելենսկու խոսքով՝ Ռուսաստանը շարունակում է հարվածներ հասցնել, այդ թվում՝ քաղաքացիական օբյեկտներին, որպեսզի կարողանա ճնշում գործադրել Ուկրաինայի վրա երկուշաբթի օրը սկսված բանակցություններում։
Reuters-ին տված հարցազրույցում Ուկրաինայի նախագահը շնորհակալություն է հայտնել արեւմտյան երկրներին իր երկրին օգնելու համար, սակայն նշել է, որ Կրեմլի դեմ կոշտ կանխարգելիչ պատժամիջոցների բացակայությունը նպաստել է Ուկրաինա ներխուժմանը։
Զելենսկին նշել է, որ ԱՄՆ նախագահ Ջո Բայդենը երեքշաբթի օրը կայացած հեռախոսազրույցում իրեն ասել է, որ ՆԱՏՕ-ի կողմից Ուկրաինայի երկնքի փակումը կնշանակի դաշինքին ուղղակիորեն պատերազմի մեջ ներքաշել Ռուսաստանի հետ։ Ուկրաինայի նախագահը կարծում է, որ Ռուսաստանն արդեն բոլորին ներքաշել է պատերազմի մեջ։