Միացյալ Նահանգները և ՆԱՏՕ-ն չորեքշաբթի օրը Ռուսաստանին են փոխանցել գրավոր պատասխաններ անվտանգության երաշխիքների վերաբերյալ առաջարկներին, որոնք Մոսկվան պահանջում է Վաշինգտոնից և Բրյուսելից։
ՏԱՍՍ գործակալությունը հայտնում է, որ փաստաթղթերի տեքստերը ամերիկյան կողմի խնդրանքով դեռ չեն հրապարակվել, սակայն ԱՄՆ պետքարտուղար Էնթոնի Բլինքենը և ՆԱՏՕ-ի գլխավոր քարտուղար Յենս Ստոլտենբերգն արդեն խոսել են հիմնական դրույթների մասին։ Արեւմուտքը, ինչպես եւ սպասվում էր, Ռուսաստանի համար սկզբունքային զիջումների չգնաց, այլ ուրվագծեց հետագա բանակցությունների ուղղությունները։
Ամերիկյան պատասխանը ռուսական կողմին փոխանցել է Մոսկվայում դեսպան Ջոն Սալիվանը, որը չորեքշաբթի երեկոյան ժամանել էր ՌԴ ԱԳՆ։ Կես ժամ անց նա առանց մեկնաբանության լքել է շենքը, իսկ ավելի ուշ նախարարությունից պարզաբանել են, որ փաստաթուղթը ստացել է վարչության պետի տեղակալ Ալեքսանդր Գրուշկոն։ ԱՄՆ պետքարտուղար Բլինքենը հայտնել է, որ Ռուսաստանին հանձնված փաստաթուղթը պարունակում է Մոսկվայի արտահայտած մտահոգությունների «սկզբունքային եւ պրագմատիկ» գնահատականը՝ ավելացնելով, որ պատասխանը լիովին համաձայնեցված է Ուկրաինայի ու Վաշինգտոնի եվրոպական դաշնակիցների հետ։
«Նախատեսում եմ մոտ օրերս խոսել նախարար Լավրովի հետ, երբ Մոսկվան կծանոթանա մեր պատասխանին»,- ասել է Պետդեպարտամենտի ղեկավարը։
ՆԱՏՕ-ն նույնպես իր պատասխանում մերժել է Ռուսաստանի պահանջը չընդլայնվելու վերաբերյալ։ Հյուսիսատլանտյան դաշինքի պատասխանը փոխանցվել է Բելգիայում Ռուսաստանի դեսպանատան միջոցով.