Սոթք համայնքում Ռուսաստանի Դաշնության դեսպան Սերգեյ Կոպիրկինը հայտարարել էր, որ ՌԴ բարձրաստիճան ղեկավարությունը ձեռնարկում է բոլոր անհրաժեշտ միջոցները հայ-ադրբեջանական սահմանին իրավիճակը կարգավորելու ուղղությամբ:
Կոպիրկինն այն նույն երկրի դեսպանն է, որի բանակին է վստահված հայ-ադրբեջանական հակամարտության խաղաղապահ առաքելությունը: Կոպիրկինը ներկայացնում է այն երկիրը, որի լռության ու անտարբերության պատճառով, իսկ գուցե նաև աջակցությամբ, տեղի ունեցավ սեպտեմբերյան ագրեսիան Հայաստանի ինքնիշխան տարածքի նկատմամբ:
Կոպիրկինն այն նույն երկրի դեսպանն է, որը մինչև այսօր հասցեական չի արձագանքնել ադրբեջանական ագրեսիային, կոչ չի արել զորքերը դուրս բերել դաշնակից երկրի սուվերեն տարածքից և չի դատապարտել ադրբեջանական վայրագությունները:
Դեսպան Կոպիրկինը պատասխանելով լրագրողների հարցերին կրկին խոսել է եռակողմ պայմանավորվածությունների, հայտարարությունների ու դրանց շուրջ տարվող այսպես ասած կարևոր, արդյունավետ ու իբր մեծ աշխատանքի մասին:
ՌԴ դեսպանի ներկայացրած արդյունավետ, կարևոր ու մեծ աշխատանքի այպես ասած արդյունքը թերևս տեսնում է միայն ինքը և իր վերադասը: Իսկ մյուսներն ու աշխարհը բոլորովին այլ բան են տեսնում: Տենսում են, թե ինչպես են ի վնաս Հայաստանի միակողմանի իրականացվում եռակողմ բոլոր պայմանավորվածությունները, ինչպես է խաղաղապահ առաքելություն ստանձնաց երկիրը աչք փակում բացահայտ ագրեսիայի նկատմամբ, ինչպես դաշնակից երկիրը լքում դաշնակցին աղետի ժամանակ:
Սրանք Կոպիրկինի երկրում ոչ թե չեն տեսնում, այլ հավանաբար չեն ցանկանում տեսնել: Փոխարենը ՌԴ դեսպանը հայտարարել է, որ Ռուսաստանը երես չի թեքում Հայաստանից:
Երես չի թեքում, իսկ ի՞նչ երեսով է հետո նայելու, եթե իհարկե պահպնավի երեսը:
