Ազգային Ժողովի արտահերթ ընտրություններն անվավեր ճանաչելու որևէ հիմք չկա։ Այս մասին կառավարության նիստից հետո հայտարարել է ՀՀ արդարադատության նախարարի պաշտոնակատար Ռուստամ Բադասյանը։
Բադասյանն ասել է, որ ինքը ՍԴ-ում լինելու է «Քաղաքացիական պայմանագիր» կուսակցության ներկայացուցիչը:
Անդրադառնալով ընդդիմադիր ուժերի պնդումներին՝ Ռուստամ Բադասյանն առաջարկեց համեմատել՝ 2021 թ. արտահերթ, և՛ ՀՀ-ում անցկացված նախկին ընտրությունների վերաբերյալ միջազգային դիտորդների զեկույցները:
«Այնտեղ կտեսնեք՝ գնահատականների ինչ էական տարբերություն կա: Վերջին ընտրությունները եղել են ժողովրդավարության լավագույն չափանիշներին համապատասխանող»,- ասել է նախարարի պաշտոնակատարը։
Բադասյան հիշեցրել է նաեւ, որ 2017 թ. ԱԺ ընտրությունների վերաբերյալ զեկույցում խոսվում է վարչական ռեսուրսի չարաշահման, կողմնակի ազդեցությունների մասին: Նա ասաց, որ այս ընտրությունների վերաբերյալ պետք է միմյանց շնորհավորեն, քանի որ դրանք ոչ թե իշխանությունների կամ ընդդիմության, այլ՝ ժողովրդի ձեռքբերումն են:
