Ադրբեջանի թենիսի ֆեդերացիան (FTA) դիմել է Թենիսի միջազգային ֆեդերացիային (ITF)՝ պահանջելով պատժել ռուսաստանցի Կարեն Խաչանովին Ավստրալիայի բաց առաջնությունում չճանաչված Լեռնային Ղարաբաղի Հանրապետությանը աջակցելու համար։ Այս մասին հայտնում է ՏՍԱԱ գործակալւթյունը հղում անելով ֆեդերացիայի հայտարարությանը։
Ավստրալիայի բաց առաջնության չորրորդ տուրի խաղում ճապոնացի Յոսիհիտո Նիշիոկայի նկատմամբ 6:0, 6:0, 7:6 (7:4) հաշվով հաղթանակից հետո Խաչանովը հեռուստատեսային տեսախցիկի էկրանին մակագրություն է թողել. «Հավատացե՛ք մինչև վերջ, Արցա՛խ, մնա՛ ուժեղ, սպասիր»։ Մրցաշարի 3-րդ տուրում հաղթելուց հետո ռուսաստանցին տեսախցիկի վրա թողել է նաև «Արցախ, սպասիր» հաղորդագրությունը։
«Տեսախցիկի օբյեկտիվների վրա սրտանց մաղթանքներ գրելը թենիսի յուրահատուկ ավանդույթ է, սակայն Խաչանովը չարաշահել է դա՝ օգտագործելով իր կեղտոտ ծրագրերում։ Ադրբեջանի թենիսի ֆեդերացիան, հաշվի առնելով նման սադրանքի անթույլատրելիությունը, բողոքի նամակ է հղել Թենիսի միջազգային ֆեդերացիա: Նամակում արտացոլված են մեր երկրի դեմ սադրանքի փաստերը, ներկայացվել են իրավական փաստաթղթեր: FTA-ն դատապարտում է նման միջադեպերը՝ պահանջելով ITF-ից պատժել Խաչանովին և ձեռնարկել կտրուկ միջոցներ, որպեսզի նմանատիպ իրավիճակներ չկրկնվեն»,- ասված է Ադրբեջանի թենիսի ֆեդերացիայի հայտարարությունում։