2022-ի հունվարի մեկից ուժի մեջ է մտնում ծխախոտային արտադրատեսակների և դրանց պատկանելիքների, փոխարինիչների հրապարակային ցուցադրման արգելքը վաճառասրահներում և հանրային սննդի օբյեկտներում։ Այս քայլը ևս կարևոր խթան կհանդիսանա ոչ վարակիչ հիվանդությունների դեմ պայքարի և երիտասարդներին առողջ պահելու հանձնառությանը։ Կառավարության այսօրվա նիստին հայտարարեց առողջապահության նախարար Անահիտ Ավանեսյանը: Ըստ նախարարի Հայաստանում 16 տարեկանից բարձր բնակչության 27,9 տոկոսը ծխում է։ Ծխողների գերակշռող մասը տղամարդիկ են, և յուրաքանչյուր երկրորդ տղամարդը ծխող է
«Մեր քաղաքականությունն ու հանձնառությունն է հնարավորինս նպաստել ծխախոտի օգտագործման նվազեցմանը և այս օգտագործման արդյունքում նաև առողջությանը պատճառած վնասների կանխմանը։ 2020 թվականին ընդունվեց Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին օրենքը, որը որոշ դրույթներով 2021 թվականից արդեն կյանքի է կոչվել։ Բայց հնարավորություն ու ժամանակ է տրվել տնտեսվարողներին իրենց գործունեությունն այնպես դասավորել, որպեսզի հնարավորինս նվազ վնասներով մենք ունենանք այսօրվա դրույթների կիրառումը։ Այսպիսով, հունվարի մեկից ուժի մեջ է մտնում ծխախոտային արտադրատեսակների և դրանց պատկանելիքների, փոխարինիչների հրապարակային ցուցադրման արգելքը վաճառասրահներում և հանրային սննդի օբյեկտներում, բացառությամբ օդանավակայանի անմաքս առևտրի խանութների»,- ասաց նախարարը։
Օրենքի կատարման վերահսկողությունն իրականացնելու են տեսչական մարմինները։ Վարչապետ Նիկոլ Փաշինյանը հիշեցրեց, որ արդեն մարտ ամսից արգելվելու է ծխախոտի օգտագործումը բոլոր փակ տարածքներում, ներառյալ՝ բացօթյա սրճարաններում։
«Ընդհանուր առամամբ սա շատ կարևոր է, և ես խնդրում եմ որևէ մեկը չթերագնահատի ծխախոտի նեգատիվ ազդեցությունը մեր հանրային առողջության վրա»,-ասաց վարչապետը:
