Սեպտեմբերի 19-ին, ՄԱԿ Գլխավոր ասամբլեայի 77-րդ նստաշրջանի շրջանակներում, ԱՄՆ պետքարտուղար Էնթոնի Բլինքենի միջնորդությամբ տեղի է ունեցել Հայաստանի ԱԳ նախարար Արարատ Միրզոյանի և Ադրբեջանի ԱԳ նախարար Ջեյհուն Բայրամովի հանդիպումը։
Հանդիպման ընթացքում Արարատ Միրզոյանը ընդգծել է, որ ադրբեջանական զինված ուժերը պետք է դուրս բերվեն ՀՀ ինքինիշխան տարածքից, ուժի կամ ուժի սպառնալիքի կիրառումն անընդունելի են, իսկ հետագա էսկալացիաների կանխարգելման նպատակով պետք է ներդրվեն միջազգային մեխանիզմներ։ ՀՀ ԱԳ նախարարը կարևորել է հումանիտար խնդիրների, այդ թվում` ռազմագերիների հայրենադարձման շուտափույթ կարգավորումը։
Նախարար Միրզոյանը վերահաստատել է հայկական կողմի պատրաստակամությունը՝ ներգրավվելու հարաբերությունների համապարփակ կարգավորման գործընթացում։
Հնադիպման մեկնարկին ԱՄՆ պետքարտուղար Էնթոնի Բլինքենը հայտարարեց՝ մեզ ոգևորում է փաստը, որ բախումները դադարել են, և վերջին օրերին նոր սրացում չի եղել:
«Թե՛ Հայաստանի, թե Ադրբեջանի առաջնորդների հետ իմ հեռախոսազրույցներում Փաշինյանն ու Ալիևը ասացին, որ պատրաստ են խաղաղության: Ամուր, կայուն դիվանագիտական ներգրավվածությունը լավագույն ճանապարհն է յուրաքանչյուրի համար։ Հայաստանի և Ադրբեջանի միջև ռազմական լուծումը տարբերակ չէ, փոխարենը կա դիվանագիտական ճանապարհը, որը տանում է խաղաղության. դիվանագիտական այդ ջանքերին աջակցելու համար է Միացյալ Նահանգները բանակցությունների հրավիրել երկու կողմերին»,- հայտարարել է Բլինքենը:
Միացյալ Նահանգների պետքարտուղար Էնթոնի Բլինքենը Արարատ Միրզոյանին և Ջեյհուն Բայրամովին կոչ է արել նորից հանդիպել մինչև սեպտեմբերի վերջ։ Այս մասին հայտնել է պետդեպի խոսնակ Նեդ Փրայսը։
Սեպտեմբերին տեղի ունեցած հայ-ադրբեջանական ռազմական բախումներն ամենակատաղին էին՝ 2020 թվականի 44 օրյա պատերազմից հետո: Այդ բախումների հետևանքով հայկական կողմից ըստ պաշտոնական տվյալի զոհված և անհետ կորած է համարվում 207 մարդ, ադրբեջանական կողմը հայտարարել է 79 զոհի մասին: