«Ես կսահմանափակվեմ Ազգային անվտանգության ծառայության տարածած հայտարարությամբ և հավելյալ մեկնաբանություն չեմ անի։ Երբ նոր մեկնաբանության անհրաժեշտություն լինի, ապա մեր համապատասխան կառույցները հանդես կգան հայտարարությամբ»,- այսօր Ազգային ժողովում լրագորղների հետ զրույցում ասել է «Քաղաքացիական պայմանագիր» խմբակցության ղեկավար Հայկ Կոնջորյանը՝ անդրադառնալով Գորիս-Կապան ճանապարհին ստեղծված խնդրի մասին հարցերին։
Հայկ Կոնջորյանը նաեւ անդրադարձել է Հայաստան մուտք գործող իրանական բեռնատարներից ադրբեջանցիների կողմից գումարներ գանձելու հարցին։
«Կան կոնկրետ պատկան ու լիազոր մարմիններ, որոնք այս մասին աշխատանք են տանում։ Երբ որ կլինեն այլ հաղորդագրություններ, այդ ժամանակ մենք բոլորս կծանոթանանք և եթե անհրաժեշտություն լինի, հանդես կգանք հայտարարություններով։ Ավելին, դուք այսօր տեսաք, որ ընդդիմադիր խմբակցություններից մեկի կողմից առաջարկ հնչեց, որպեսզի ԱԺ-ում փակ քննարկում արվի՝ համապատասխան գերատեսչությունների ներկայացուցիչների մասնակցությամբ։ ԱԺ նախագահն էլ առաջարկեց գրավոր դիմել, մենք քննարկենք, հասկանանք։ Եթե հանդիպումը կայանա, ապա պետք է հրավիրենք համապատասխան գերատեսչությունների ներկայացուցիչներին, ովքեր քննարկման ժամանակ ինֆորմացա կներկայացնեն»,- նշել է Կոնջորյանը։