Դեկտեմբերի 25-ին Սայաթ-Նովայի անվան երաժշտական դպրոցի մեծ դահլիճում տեղի ունեցավ համերգասրահի վերաբացման առիթով մեկնարկած տոնական համերգաշարի երկրորդ համերգը՝ Տիգրան Հեքեքյանի ղեկավարած «Հայաստանի փոքրիկ երգիչներ» երգչախմբի մասնակցությամբ։
Այն նվիրված էր 20-րդ դարի հայ մեծանուն բանաստեղծ Վահագն Դավթյանի 100-ամյա հոբելյանին։
Միջոցառմանը մասնակցում էին նաև ասմունքող Սիլվա Յուզբաշյանը, դերասան Արթուր ՈՒթմազյանը և գրականագետ Էմմա Գրիգորյանը։
Հնչեցին Վահագն Դավթյանի գրվածքները՝ բանաստեղծություններ, հուշ-պատառիկներ մանկությունից։ Հուզիչ էին կտորները եղեռնի պատճառով Արևմտյան Հայաստանի մնացյալ հողերի հետ կորսված՝ բանաստեղծի հայրենի Արաբկիր գյուղաքաղաքի մասին. կարոտալի նկարագրությունները կապույտ կավե տանիքների, Եփրատի կապույտ ալիքների ու տատիկի թխած հացի անուշ բույրի մասին, որ մանկության բույրն էր…
Երեկոյի ընթացքում նաեւ ցուցադրվեց Արամ Սուքիասյանի փոքրիկ ֆիլմը բանաստեղծի մասին։
Ամբողջ միջոցառումը հայրենասիրությանը, հայրենապաշտությանը, հայրենի հողին, պատմությանն ու ոգուն նվիրված ձոն էր, աղոթք, խնկարկում, որ անտարբեր չթողեց հանդիսատեսին, ում աչքերում հաճախ արցունք էր երևում։ Նաև ոգու, հաղթական զարթոնքի, հույս ու ուժ ներշնչող երեկո էր՝ շատերի պնդմամբ այս օրերին բոլորին օդի պես անհրաժեշտ:
Թերևս իրոք կարևոր և արդիական հույզեր, մտքեր պարգևեց միջոցառումը ներկաներին՝ հերթական անգամ փաստելով, որ հայ մեծերի գործը ժամանակ չի ճանաչում և իր առաքելությունն է կատարում նրանց ապրելուց էլ դարեր անց՝ կրթում է, ուղի հարթում, ապրեցնում:
