Հայաստանը ռուս զբոսաշրջիկների արտասահմանյան ուղևորություններում երկրորդ տեղն է զբաղեցնում։ Մոսկվան և Երևանը կշարունակեն ամրապնդել զբոսաշրջային կապերը։ Այս մասին հայտնել է ՌԴ փոխվարչապետ Ալեքսեյ Օվերչուկը։
«Իսկապես, Հայաստանն այսօր շատ սիրված է ՌԴ քաղաքացիների կողմից և արտասահմանյան ուղևորությունների թվով երկրորդ տեղում է, իսկ այսօր՝ Ամանորի նախաշեմին, շատ մարդիկ են մեկնում Հայաստան»,-ասել է նա՝ Մոսկվայում կայացած Ռուսաստանի և Հայաստանի միջև տնտեսական համագործակցության միջկառավարական հանձնաժողովի 21-րդ նիստից հետո։
Բացի այդ, փոխվարչապետը նշել է, որ երկու երկրների միջև ապրանքաշրջանառության աճը մեծապես պայմանավորված է Հայաստանում արտադրվող արտադրանքով։ «Դա շատ լավ է Եվրասիական տնտեսական միությունում մեր փոխգործակցության տեսանկյունից։ Մեզ մոտ շատ լավ է աճել այն գործարքների մասնաբաժինը, որոնք իրականացվում են ազգային արժույթներով»,- նշել է Օվերչուկը:
«Կապերը հենց այնպիսին են, ինչպիսին պետք է լինեն դաշնակիցների միջև»,- ընդգծել է ՌԴ փոխվարչապետը։
