2021թ․ սեպտեմբերի 16-ին Հայաստանը և Եվրոպական միությունը հաջողությամբ ավարտեցին բանակցությունները «Հորիզոն Եվրոպա» (Horizon Europe – the Framework Programme for Research and Innovation) ծրագրին Հայաստանի ասոցիացման շուրջ։ Այս մասին տեղեկացնում է ՀՀ ԱԳ նախարարությունը։
Ամիսներ տևած բանակցությունները հայկական կողմից վարել են Հայաստանի Հանրապետության արտաքին գործերի նախարարությունը՝ ՀՀ կրթության, գիտության, մշակույթի և սպորտի նախարարության Գիտության կոմիտեի մասնակցությամբ, իսկ եվրոպական կողմից՝ Եվրոպական հանձնաժողովի՝ հետազոտության և նորարարության հարցերով գլխավոր տնօրինությունը։
Բանակցությունների արդյունքում կողմերը համաձայնության եկան ասոցիացման համաձայնագրի շուրջ, և երկուստեք հույս հայտնեցին, որ համաձայնագրի ստորագրման և վավերացման ներքին ընթացակարգերը կհասնեն իրենց ավարտին սահմանված ժամկետներում։
Միանալով վերոնշյալ ծրագրին՝ Հայաստանի Հանրապետությունը կնպաստի Հայաստանում գիտական ներուժի զարգացմանը, մեր գիտական համայնքին տրամադրելով տարբեր դրամաշնորհային նախաձեռնություններին մասնակցելու բազում հնարավորություններ։
«Հորիզոն Եվրոպա» ծրագիրն Եվրոպական միության ամենամեծ ֆինանսավորում՝ 95,5 մլրդ եվրո ունեցող գիտական համագործակցության ծրագիրն է։ Այն փոխարինելու է «Հորիզոն 2020» ծրագիրը, որին Հայաստանը հաջողությամբ մասնակցել է 2016-2020թթ.։