Ֆրանսիայի նախագահ Էմանուել Մակրոնը հայտնել է, որ հինգշաբթի օրը ՌԴ նախագահ Վլադիմիր Պուտինի հետ հեռախոսազրույցում նրան է փոխանցել Ուկրաինայի նախագահ Վլադիմիր Զելենսկու բանակցությունների վերաբերյալ խնդրանքը։ Այս մասին հաղորդել Է «Ինտերֆաքս»-ը:
«Նախագահ Զելենսկու խնդրանքով ես անկեղծ, անմիջական և արագ զրույց ունեցա նախագահ Պուտինի հետ՝ նախ և առաջ խնդրելու նրան դադարեցնել մարտերը որքան հնարավոր է շուտ, բայց հատկապես առաջարկել բանակցություններ վարել, խնդրել բանակցություն վարել նախագահ Զելենսկու հետ»,- Բրյուսելում ԵՄ արտահերթ գագաթնաժողովից հետո տեղի ունեցած ասուլիսի ժամանակ ասել է Մակրոնը։
Ֆրանսիայի նախագահն ասել է, որ Զելենսկին չի կարողացել կապ հաստատել Պուտինի հետ:
«Ես միաժամանակ հստակ կերպով փոխանցեցի Ֆրանսիայի այս ուղերձը Ռուսաստանի Դաշնությանը, ինչպես նաև փոխանցեցի Ուկրաինայի նախագահի ուղերձը Ռուսաստանի նախագահին: Ինչպես հիմա տեսնում եք, դա չստացվեց, քանի որ ՌԴ նախագահն ընտրեց պատերազմը»,- ասել է Մակրոնը։