Եվրոպական մի քանի երկրներում տեղի են ուցել մայիսմեկյան տոնին նվիրված ակցիաներ։ Որոշ երկրներում դրանք վերածվել են բախումների իրավապահների հետ։
Մայիսմեկյան տոնին մոտ հարյուր հազար մարդ է մասնակցել Իսպանիայում։ Ակտիվիստների երթն անցել է Մադրիդի կենտրոնով, այս մասին տեղեկացրել է РИА Новости-ն:
Աշխատանքի օրվան նվիրված ակցիային մասնակցել են Իսպանիայի մի քանի նախարարներ, ինչպես նաև երկրի փոխվարչապետ Կարմեն Կալվոն:
Մադրիդի տարբեր հատվածներում ակցիաներն անցկացվել են իրավապահների ներկայությամբ: Իսպանիայում կորոնավիրուսի համավարակի պատճառով կարանտինից և խիստ սահմանափակումներից հետո արհմիությունները մայիսի մեկին առաջին անգամ են դուրս գալիս փողոց:
Իսկ Ֆրանսիայի մայրաքաղաքում մայիսմեկյան ավանդական ակցիան, որը մեկնարկել է Հանրապետության հրապարակից, վերածվել է բախումների։
Ակցիային մասնակցել են արհմիությունների, երիտասարդական կազմակերպությունների, սոցիալիստական և կոմունիստական կուսակցությունների ներկայացուցիչներ, նաև «Դեղին բաճկոնավորներ» շարժման համակիրներ:
Ակցիայի սկզբից ակտիվիստները շշեր են նետել կարգուկանոնն ապահովող իրավապահների ուղղությամբ: Ոստիկանները բերման են ենթարկել 17 մարդու:
Ոստիկանությունը նաեւ արցունքաբեր գազ է կիրառել։
Թուրքիայում նույնպես մասյիսմեկյան ցույցերը հանգիստ չեն անցել։ Ստամբուլում Թուրքիայի քաղաքացիները փորձել են նշել մայիսմեկյան տոնը, որը, կորոնավիրուսի համավարակով պայմանավորված, երկրի իշխանություններն արգելել էին:
Ցույցերի ժամանակ ձերբակալվել է մոտ 100 ակտիվիստ, որոնք փորձել են մոտենալ Թաքսիմ հրապարակին և քաղաքի մյուս հանրային վայրերին: Իրավապահներն արցունքաբեր գազ են կիրառել։
Ձերբակալություններ են եղել նաև Անկարայում: Թուրքիայի մայրաքաղաքում ձերբակալվել է առնվազն 11 ակտիվիստ:
