Հանրահայտ հոլիվուդյան ֆիլմերի մեղեդիներ՝ երևանյան բեմում:
Օրերս «Արամ Խաչատրյան» համերգասրահում տեղի ունեցավ «Սիմֆոնիկ Հոլիվուդ» համերգը, որի ծրագրում ներառված են հոլիվուդյան կինոնկարների երգերը:
Այս համերգային ծրագիրը սիրված եւ սպասված է հանրության կողմից. դա է փաստում մեկ օրվա ընթացքում կայացած 2 համերգը: Առաջին համերգին հիմնականում ներկա էին ԴասԱ ծրագրի ներկայացուցիչները՝ դպրոցների աշակերտներ։ Երկրորդ համերգի տոմսերը սպառվել էին համերգից օրեր առաջ:
Հայաստանի պետական սիմֆոնիկ նվագախումբը կատարեց «Աստղային պատերազմներ», «Առաքելությունն անիրագործելի է», «Մեռնել ուրիշ անգամ», «Ռոկկի», «Մալենա», «Նախաճաշ Թիֆանիի մոտ», «Ռոմեո և Ջուլիետ», «Լեգենդ դաշնակահարի մասին», «Կարիբյան ծովի ծովահենները», «Գլադիատոր», «Կնոջ բույրը», «Դաշնակահարը», «Մեկ անգամ Ամերիկայում», «Կնքահայրը», «Գահերի խաղը» և այլ ֆիլմերի սաունդթրեքները։
Համերգը ղեկավարում էր դիրիժոր Հարություն Արզումանյանը: Հանդիսականներն ուշադրությամբ դիտում էին մեծ էկրանին ցուցադրվող ֆիլմերից հատվածներն ու զուգահեռ ունկնդրում հոգեթով մեղեդիները: