Ինչ էլ որ լինի, մենք պետք է գործընթացն ուղղորդենք ԵԱՀԿ Մինսկի խմբի շրջանակներում: Այս մասին այսօր Երևանում հայտարարել է Ավստրիայի եվրոպական և արտաքին գործերի դաշնային նախարար Ալեքսանդր Շալենբերգը։
«Միջազգային հանրությանը պետք են Երևանը, Բաքուն, ադրբեջանցիները և հայերը, որպեսզի նրանք կամք դրսևորեն այդ ուղիով առաջ գնալու։ Մենք գիտենք, որ վերքը դեռևս բաց է: Մի շարք բաց խնդիրներ դեռևս առկա են, բայց ես անցյալ ամառվա համեմատ այժմ ավելի ճիշտ ուղղությամբ ձեռնարկվող քայլերի նշաններ եմ տեսնում։ Ավստրիայի, Եվրոպական միության ու նաև ԵԱՀԿ անունից եմ խոսում, որ մենք պատրաստակամ ենք օգնելու, բայց դուք պետք է ցանկանաք ընդունել մեր օգնությունը։ Մենք կարող ենք որպես միջազգային հանրություն միայն որոշակի ճանապարհ կտրել։ Ես հիմա տեսնում եմ պատրաստակամությունը՝ ճիշտ քայլերի դիմելու, և քաջություն է պահանջվում դրա համար, որը պահանջվում է երկու երկրների ղեկավարներից էլ»,- ասաց Ալեքսանդր Շալենբերգը։
