ՄԻԵԴ-ում Հայաստան ընդդեմ Թուրքիա գանգատը գտնվում է քննության փուլում: Այս մասին Ազգային ժողովում ասել է ՄԻԵԴ-ում ՀՀ ներկայացուցիչ Եղիշե Կիրակոսյանը:
«Հայաստանը մայիսի 9-ին միջպետական գանգատ ներկայացրել է Մարդու իրավունքների եվրոպական դատարան Թուրքիայի դեմ` հիմնվելով եվրոպական կոնվենցիայի վրա: Գանգատը վերաբերվում է 44-օրյա պատերազմի ընթացքում Թուրքիայի ուղղակի և անմիջական ներգրավվածության, ինչպես նաև Թուրքիայի կողմից վարձկանների հավաքագրման, ֆինանսավորման մասին, որոնք նպաստել են նույն խախտումներին, որոնք կատարել է Ադրբեջանը`խոսքը կյանքի իրավունքի, սեփական իրավունքի և այլ հոդվածների խախտումների մասին է: Այս պահի դրությամբ գտնվում է քննության փուլում: Քննարկվում է Մեծ պալատին կամ պալատին իրավազորությանը տրամադրելու հարցը: Ընթացքի մասին կտեղեկացնենք»,- նշել է Կիրակոսյանը:
Եղիշե Կիրակոսյանը նաեւ խոսել է գերիների, գերեվարված անձանց, անհետ կորածների հարցերով միջազգային իրավական պրոցեսների մասին:
«Գերիների, գերեվարված անձանց, անհետ կորածների հարցերով մի շարք պրոցեսներ ունենք, որոնք ընթանում են նախ Եվրոպական դատարանում: Այնտեղ պատերազմի ընթացքից սկսած մինչև այսօր էլ վերջին դեպքերի հետ կապված ներկայացրել էինք միջանկյալ միջոցներ կիրառելու մասին բազմաթիվ դիմումներ, որոնք վերաբերում են գերեվարված անձանց իրավունքների երաշխավորմանը:
Այս գործընթացներով, ցավոք սրտի, ադրբեջանական կողմի վարքագիծը կանխատեսելի հակասում է դատարանի կողմից կայացված որոշումներին, որովհետև նրանք հետևողականորեն խախտում են ժամկետները, տրամադրում են քիչ տեղեկատվություն: Բայց կա նաև ՄԱԿ-ի արդարադատության միջազգային դատարանում ընթացող պրոցեսը, որի հետ կապված ունենք լրացուցիչ որոշում»,- ասել է Եղիշե Կիրակոսյանը: