Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանը հունվարի 21-ին նշում է ծննդյան 34-րդ տարեդարձը:
Հենրիխ Մխիթարյանը Հայաստանի հավաքականի պատմության լավագույն ռմբարկուն է։ 2007-2021թթ.-ին նա ազգային թիմում անցկացրել է 95 հանդիպում ու դարձել 32 գոլի հեղինակ։ Նա նաև 10 անգամ ճանաչվել է Հայաստանի լավագույն ֆուտբոլիստ։
Կիսապաշտպանը 2022թ.-ից է խաղում «Ինտերում», որի կազմում օրեր առաջ նվաճել էր առաջին տիտղոսը՝ դառնալով Իտալիայի սուպերգավաթակիր։ Կարիերայի ընթացքում նա խաղացել է նաև Երևանի «Փյունիկում» (2006-2009թթ.), Դոնեցկի «Մետալուրգում» (2009-2010թթ.) ու «Շախտյորում» (2010-2013թթ.), Դորտմունդի «Բորուսիայում» (2013-2016թթ.), անգլիական «Մանչեսթեր Յունայթեդում» (2016-2018թթ.) ու «Արսենալում» (2018-2019թթ.) և իտալական «Ռոմայում» (2019-2022թթ.)։
Հենրիխ Մխիթարյանը Եվրոպա լիգայի ու Կոնֆերենցիաների լիգայի հաղթող է։
