Մոսկվան տեսնում է Երևանի և Բաքվի դրական վերաբերմունքը փաթեթային պայմանավորվածությունների ձեռքբերման վերաբերյալ։ Այս մասին ՏԱՍՍ-ի փոխանցմամբ հայտարարել է ՌԴ ԱԳՆ տեղեկատվության և մամուլի վարչության պետի տեղակալ Ալեքսեյ Զայցևը:
Զայցեւի խոսքով Լեռնային Ղարաբաղի կարգավորման հարցերում չափազանց կարեւոր է փոխադարձ ընդունելի լուծումներ գտնելու հնարավորությունների ապահովումը:
«Նման վերաբերմունքի օբյեկտիվ պահանջի հաստատումն է ամենաբարձր մակարդակով և՛ Բաքվի, և՛ Երևանի կողմից հարաբերությունների նոր էջ բացելու և դրանց աստիճանական նորմալացման պատրաստակամությունը։ Մեր աշխատանքում մենք կենտրոնանում ենք նման դրական պահերի վրա»,- նշել է Զայցեւը։
Զայցեւը նաեւ անդրադարձել է փոխվարչապետների եռակողմ հանդիպումներին եւ նշել է, որ Ռուսաստանի, Հայաստանի և Ադրբեջանի փոխվարչապետների ղեկավարությամբ եռակողմ աշխատանքային խմբի աշխատանքը շարունակվում է:
«Անդրկովկասում տնտեսական և տրանսպորտային կապերի ապաշրջափակման եռակողմ աշխատանքային խումբը շարունակում է իր գործունեությունը Ռուսաստանի, Ադրբեջանի և Հայաստանի փոխվարչապետների մակարդակով»,-նշել է նա: