ՀՀ վարչապետ Նիկոլ Փաշինյանը 2023թ. պետական բյուջեի նախագիծը ներկայացնելիս խոսել է պաշտպանության ոլորտի ծախսերի մասին։ Ըստ նրա, այդ ծախսերի էական ավելացումն ու ԶՈՒ-ում նախատեսված բարեփոխումները որևէ ձևով չեն հակասում խաղաղության օրակարգին։
«ՀՀ-ն հռչակված խաղաղության օրակարգը հետևողականորեն առաջ է մղելու»,-նշել է Փաշինյանը։
Նա մանրամասներ է ներկայացրել Սոչիում տեղի ունեցած եռակողմ հանդիպումից. «Արդյո՞ք այդ հանդիպման արդյունքում կարող ենք արձանագրել, որ քայլ արվեց խաղաղության օրակարգի իրականացման ուղղությամբ։ Ես կարող եմ ասել՝ այո, միանշանակ։ Եւ սա շատ օգտակար, կարևոր հանդիպում էր»։
Փաշինյանը նշեց, որ հանդիպմանը շատ կարևոր հարցեր են հնչել։ Նա հիշեցրեց՝ հանդիպումից առաջ հարց է հնչել՝ արդյո՞ք ՀՀ-ն Ադրբեջանի հետ հարաբերությունների կարգավորման և ԼՂ հիմնախնդրի կարգավորման ճանապարհին գնում է հնարավոր ամենաօպտիմալ տարբերակով, որ առկա է դաշտում. «Եւ խոսք էր գնում այն մասին, թե բովանդակային առումով ինչքանո՞վ է կառավարության վարած քաղաքականությունը, բանակցություններում ներգրավված պաշտոնյաների քաղաքականությունը համապատասխանում ՀՀ-ի և ԼՂ շահերին։ Կարծում եմ՝ Սոչիում կայացած հանդիպման կարևորագույն նրբություններից մեկն այս հարցի պատասխանն էր»։