Մայիսի 16-ին Երևանի թատրոնի և կինոյի պետական ինստիտուտի ուսանողական գիտական, ստեղծագործական ընկերության նախաձեռնությամբ Երիտասարդական թատրոնի ճեմասրահում, ցուցադրվեցին Արցախում բնակվող լուսանկարիչների լուսանկարները՝ «Շրջափակման ձայնը» խորագրով ։
Արցախը 159 օր է շրջափակման մեջ է՝ զուրկ լինելով կրթական, առողջական, սոցիալական և այլ պահանջներից։ Արարողությունը սկսվեց ԵԹԿՊԻ-ի ռեկտոր Սառա Նալբանդյանի խոսքով.
«Շնորհակալ եմ , որ բարձրաձայնել եք այս խնդիրը։ Շատ կարևոր է որ Արցախ աշխարհի համար իրազեկված լինի հասարակությունը»,-ասաց ռեկտորը։
Խոսեց նաև ԵԹԿՊԻ-ի ուսանողական, գիտական, ստեղծագործական ընկերության նախագահ, դրամատուրգ Վովա Արզումանյանը.
«Շնորհակալ եմ, որ ձեր ժամանակը տրամադրել եք Արցախի մասին տեսնելու, լսելու և Արցախով ապրելու համար: Այս ամենով պետք է հիշեցնենք, որ Արցախում ապրում են հայեր և Արցախը հայկական է։ Շնորհակալ եմ ԵԹԿՊԻ-ի ուսանողական և դասախոսական կազմին մեզ աջակցելու համար, նաև այն լուսանկարիչներին, ովքեր գործակցեցին մեզ հետ»,-նշեց Արզումանյանը։
Ցուցահանդեսի համար 100 լուսանկարներից առանձնացվել էին 33-ը, որոնցում պատկերված է մեր հայրենակիցների կյանքը շրջափակման մեջ։
Այսօր Արցախը ապրում է բանտարկված պայքարով։ Արցախի հարցը վտանգված է և շատ լուրջ քայլեր պետք է ձեռնարկվեն այս հարցի շուրջ։ Ցուցահանդեսի նպատակն էր ի ցույց դնել հանրությանը այն դրվագները, որին մենք ականատես չենք լինում։
Շրջափակումը նույնպես ձայն ունի, որը լսելի է լուսանկարչական արվեստի միջոցով հավերժացված գործերում։
Փակ դռները մի օր կբացվեն Արցախ աշխարհի և արցախցիների համար։
Ցուցահանդեսը կգործի մայիսի 16-18-ը։
Հեղինակ՝ Սոֆյա Կարապետյան