Ստեղծված բարդ աշխարհաքաղաքական վիճակում Հայաստանի Հանրապետությունը պետք է վարի ակտիվ արտաքին քաղաքականություն եւ այդ ակտիվության մասին որոշակի պատկերացում տալիս է վարչապետի մակարդակով տեղի ունեցած միջազգային շփումները: Այս մասին ապրիլի 13-ին Ազգային ժողովում ունեցած ելույթի ժամանակ նշեց ՀՀ վարչապետ Նիկոլ Փաշինյանը:
Նիկոլ Փաշինյանը կարեւոր համարեց նաև ՀՀ վարած տարածաշրջանային քաղաքականությունը:
«Իրանի եւ Վրաստանի հետ մեր ավանդական ակտիվ շփումները փորձում ենք ավելի ակտիվացնել, միեւնույն ժամանակ՝ խոսակցություն սկսելով նաեւ Ադրբեջանի ու Թուրքիայի հետ: Այստեղ, իհարկե, որեւէ իլյուզիա չունենք, բայց այն, որ խոսակցությունը պետք է շարունակվի՝ իրական երկխոսություն դառնալու ձգտումով, կարծում եմ՝ ակնհայտ է եւ բխում է Հայաստանի Հանրապետության պետական շահերից:
Պետական շահը, մեր երկրի պետական շահն է այն գործոնը, որ պետք է դառնա մեր մոտիվացիան բոլոր գործողություններում»,- նշեց ՀՀ վարչապետը:
Խոսելով Հայաստանի եւ Թուրքիայի հատուկ ներկայացուցիչների հանդիպումների մասին Նիկոլ Փաշինյանը նշեց՝ նրանք պայմանավորվել են, որ Հայաստան-Թուրքիա գործընթացը պետք է տեղի ունենա առանց նախապայմանների, և հայկական կողմը գործընթացը շարունակում է այդ տրամաբանությամբ։
«Մենք մեր միջազգային գործընկերների հետ քննարկումներում ասում ենք, որ մենք տպավորություն ունենք, որ գործընթացը կարող է և արագ արդյունքներ չունենալ։ Բայց, եթե գործընթացն արագ արդյունքներ չունենա, շատ մեծ է հավանականությունը, որ այդ գործընթացը կլճանա։ Եվ մենք պետք է մեր կողմից ամեն ինչ անենք, որ դա տեղի չունենա, և մենք կարողանանք փոքր քայլերով առաջ շարժվել»,- ասաց նա։
