ԱԺ փոխնախագահ Ռուբեն Ռուբինյանն Աժ նիստում պատասխանեց ընդդիմադիրների մեղադրանքներին, թե իբր հայ-թուրքական բանակցությունները գաղտնի են ընթանում:
«Ասում եք՝ ամեն ինչ իմանում ենք Թուրքիայից։ Մինչ այս պահը չի եղել մի իրադարձություն, որի մասին մեր համապատասխան գերատեսչությունը՝ արտգործնախարարությունը չի տեղեկացրել։ Դուք ասում եք՝ տեղի են ունենում գաղտագողի գործընթացներ։ Ինձ ամենաշատը սա է նյարդայնացնում, որովհետև ՀՀ պատմության ընթացքում Թուրքիայի հետ տեղի են ունեցել բանակցություններ բոլոր նախագահների օրոք։ Եվ, ի՞նչ եք կարծում, այդ բանակցությունների քանի տոկոսն է եղել գաղտնի և քանիսն են եղել բաց։ Ավելի շատ տոկոսը եղել է գաղտնի, քան բաց։ Օրինակ՝ նույն ֆուտբոլային դիվանագիտությունը, որի հրապարակային մասը սկիզբ է առել Սերժ Սարգսյանի նախագահության օրոք։ Ըստ ձեզ՝ այդ գործընթացի ոչ հրապարակային մասը սկիզբ է առել Սերժ Սարգսյանի օրո՞ք, ոչ, սկիզբ է առել Ռոբերտ Քոչարյանի նախագահության օրոք։ Հարց՝ արդյոք գաղտագողի գործընթացներ էին տեղի ունենում Հայաստանի և Թուրքիայի միջև։ Եվ ինչո՞ւ Ռոբերտ Քոչարյանի օրոք չէր հայտարարվում գաղտնի բանակցությունների մասին։ Այն, ինչ դուք անում եք, երեսպաշտության տպավորություն է ստեղծում»,- ասաց Ռուբեն Ռուբինյանը։