Պաշտպանության նախարարը ներկայացրել է պաշտոնանկ արված զինվորականների ցանկը

Գեղարքունիքի զորամասերից մեկում տեղի ունեցած հրդեհի պատճառով մի խումբ զինվորականներ պաշտոնանկ են արվել. այս մասին կառավարության նիստում տեղեկացրել է պաշտպանության նախարար Սուրեն Պապիկյանը։

Զբաղեցրած պաշտոններից ազատվել են

.2-րդ բանակային կորպուսի հրամանատար, գնդապետ Վահրամ Ֆրունզի Գրիգորյան,

.2-րդ բանակային կորպուսի շտաբի պետ-կորպուսի հրամանատարի տեղակալ, գնդապետ Միհրան Սերգեյի Մախսուդյան,

.2-րդ բանակային կորպուսի հրամանատարի տեղակալ թիկունքի և ԿՇԾ գծով, թիկունքի պետ՝ գնդապետ Շիրազ Գևորգի Խաչատրյան,

.2-րդ բանակային կորպուսի հրամանատարի մարտական հերթապահության գծով տեղակալ գնդապետ Արթուր Սերժիկի Օհանյան,

.բրիգադի շտաբի պետ-հրամանատարի տեղակալ, փոխգնդապետ Ռուդիկ Էդիկի Հակոբյան,

.բրիգադի հրամանատարի տեղակալ թիկունքի և ԿՇԾ գծով, փոխգնդապետ Գոռ Սերգոյի Աղեկյան,

.բրիգադի ինժեներական ծառայության պետ, կապիտան Տիգրան Նվերի Ղազարյան,

.բրիգադի ինժեներասակրավորային վաշտի հրամանատար, կապիտան Գոռ Գեղամի Սարգսյան:

«Իրենց զբաղեցրած պաշտոններն ինչ-որ կերպ առնչվում են խնդրին, բնականաբար, մինչև ավելի մանրամասն քրեաիրավական գնահատական տրվի խնդրին, նրանց հետագա պաշտոնավարումը նպատակահարմար չէ»,- ասել է Սուրեն Պապիկյանը։

ՀՀ վարչապետ Նիկոլ Փաշինյանն էլ նշել է, թե խոսքն պաշտոնեական պատասխանատվության մասին է, իսկ քրեական պատասխանատվության օբյեկտները կպարզվեն գործի վարույթի ընթացքում. «Բայց ակնհայտ է, որ ամենապրիմիտիվ հակահրդեհային կանոնները չեն պահպանվել»։