ՀՀ առողջապահության նախարար Անահիտ Ավանեսյանն անդրադարձել է Լաչինի միջանցքի փակման հետևանքով Արցախի առողջապահական համակարգում ստեղծված իրավիճակին։
Ավանեսյանը տեղեկացրել է, որ նախարարությունն ու մասնագիտական թիմերը կապի մեջ են ԼՂ հետ, և ծանր պացիենտների հսկողությունն իրականացվում է միացյալ ուժերով.
«Այս պահին հետևում ենք իրավիճակին և մեր բոլոր խողովակներով փորձում ճնշում բանեցնել և, ի վերջո, մեր պահանջը տեղ հասցնել, որ այս պացիենտների կյանքին վտանգ է սպառնում, և անհրաժեշտ է րոպե առաջ ապաշրջափակել կյանքի ճանապարհը՝ Լաչինի միջանցքը, և հնարավորություն ընձեռնել՝ վերականգնել մարդկանց բնականոն կյանքը»,- նշել է Ավանեսյանը։
Անահիտ Ավանեսյանն ասել է, որ միջազգային կառույցներին փոխանցել են իրավիճակի հետևանքով ստեղծված խնդիրների մասին ինֆորմացիա.
«Պահանջատեր ենք, որ բոլոր միջազգային կառույցներն իրենց կողմից ճնշում բանեցնեն և, ի վերջո, այս մարդկանց կյանքին վտանգ սպառնացող կրիտիկական վիճակի ուղղման ուղղությամբ քայլեր ձեռնարկեն»,- ընդգծել է նախարարը։
Անահիտ Ավանեսյանը նշել է նաև, որ ոչ միայն պաշտոնական գրագրությամբ, այլև անմիջական կապի միջոցով է աշխատանք տարվում։
Ըստ նախարարի՝ ԼՂ շրջափակման ամեն օրը ստեղծում է թե պարենային ապրանքների, թե դեղորայքի, թե բժշկական ապրանքների դեֆիցիտ։
