ՀՀ գործող իշխանությունն իր առաքելությունն է համարում գնալ ինչ-որ լուծումների և երկարաժամկետ խաղաղություն ապահովել Հայաստանի և տարածաշրջանի համար: Այս մասին Ազգային Ժողում՝ ասաց ՀՀ վարչապետ Նիկոլ Փաշինյանը:
«Մենք պետք է իլյուզիաներ չունենանք: Ղարաբաղի հարցի ամենամեծ պրոբլեմներից մեկը ո՞րն է եղել և շարունակում է մնալ. որ դրա լուծումը, լուծման այս կամ այն բանաձևը միայն մեզանից չէ կախված: Ես ուզում եմ, որ մենք խորը ընկալենք այս նրբությունները: Պետականության կշիռը, քաշը, աստիճանը աստեղ է շատ կարևոր, թե քո տեսակետը ինչքանո՞վ կարող ես առաջ մղել՝ առանց վնասելու ինքդ քեզ: Այստեղ շատ կարևոր նրբություններ կան»,-ասաց Փաշինյանը՝ հավելելով, որ պետք է ի վերջո սկսել խոսել այդ թեմայով, կարողանալ պատճառահետևանքային կապերը ճիշտ և հստակ ընդգծել:
Վարչապետի խոսքով՝ պատմական իրողություններն էլ այնպես չէ, որ ինչ-որ կոնկրետ և տեսանելի տեղ են տանում:
«Այդ պրոցեսը պետք է անընդհատ կառավարվի: Թեմայի բարդությունը սրա մեջ է»,-նշեց նա:
Անդրադառնալով Ղարաբաղի հարցի բանակցային գործընթացի առանձնահատկությանը՝ Փաշինյանը կրկնեց՝ այն, ինչին Հայաստանը երկար բանակցությունների արդյունքում համաձայնել է, հաջորդ պահին արդեն Ադրբեջանը դրա հետ համաձայն չի եղել:
«Այս իրողություններն էլ պետք է հաշվի առնենք: Այլ բան, որ պետք է գտնենք ճիշտ բալանսը, որտեղ կարող ենք հանգել ինչ-որ լուծումների: Եվ ես կարծում եմ՝ մեր առաքելությունը այդ է՝ գնալ ինչ-որ լուծումների և երկարաժամկետ խաղաղություն ապահովել ՀՀ-ի և տարածաշրջանի համար: Բայց դա չի նշանակում, որ կա երաշխիք, որ մենք դա կարող ենք անել: Մենք դա կարող ենք չկարողանալ անել՝ ամենատարբեր պատճառներով»,- նշեց Նիկոլ Փաշինյանը:
Իսկ, թե ի՞նչ պատճառներ կարող են լինել որևէ լուծման չհասնելու համար, Փաշինյանը ասաց. «Պատճառ 1՝ մեր ժողովուրդը կարող է ասել, որ իր համար ընդունելի չէ: Պատճառը 2՝ միջազգային կոնյուկտուրան կարող է թույլ չտալ, որ դա տեղի ունենա»:
