Նիկոլ Փաշինյանը համապարփակ ռեֆորմների գործընթաց է սկսել իր երկրում, այս ճանապարհին Գերմանիան շարունակելու է օգնել Հայաստանին իր հնարավորությունների սահմաններում։ Այս մասին ՀՀ վարչապետիի հետ համատեղ ասուլիսի ժամանակ հայտարարել է Գերմանիայի կանցլեր Օլաֆ Շոլցը։
Գերմանիայի կանցլերի խոսքով՝ ռուս-ուկրաինական հակամարտությունը հատկապես Հայաստանի վրա ազդեցություն է ունեցել, ուստի կարևոր է, որ Հայաստանն ու Ադրբեջանը լուծման գնան քայլ առ քայլ։
«Մենք մտահոգված ենք հայ-ադրբեջանական սահմանի անկայունությամբ և ԼՂ-ում սրվող իրավիճակով։ Ստատուս քվոն չի կարող շարունակվել։ Պետք է երկարաժամկետ լուծման հանգել: Պետք է հասնել խաղաղ հանգուցալուծման Հայաստանի և Ադրբեջանի տարածքային ամբողջականության, ինչպես նաև ԼՂ-ի քաղաքացիների ինքնորոշման իրավունքի տեսանկյունից: Ընդ որում, այս բոլոր սկզբունքները հավասարազոր են»,- ասել է Շոլցը։
Նա նշել է, որ Գերմանիան աջակցում է Շառլ Միշելի միջնորդական ջանքերին, և դա արտահայտվել է գերմանական անձնակազմ ուղարկելով ԵՄ առաքելության կազմում։ Ընդ որում՝ գերմանացի դաշնային ոստիկան է ղեկավարելու այդ առաքելությունը։
Իր հերթին՝ ՀՀ վարչապետը նշել է, որ ԵՄ դիտորդական առաքելության ներկայությունը կարգավորվում է փոխադարձ պաշտոնական նամակներով, բայց կա պայմանավորվածություն, որ այն կարգավորող պայմանագիր պետք է քննարկվի, բանակցվի և ստորագրվի։
«Առաջիկայում հնարավոր է ստորագրենք մոնիթորինգի առաքելության ներկայությունը կարգավորող փաստաթուղթ»,- հավելել է վարչապետը։