ԱՄՆ նախագահ Ջո Բայդենը երեքշաբթի երեկոյան հանդես է եկել Կոնգրեսում իր առաջին ուղերձով: Բայդենն իր ելույթի զգալի մասը նվիրել է Ուկրաինա ռուսական ներխուժմանը։ Նա ասել է, որ Ռուսաստանի նախագահ Վլադիմիր Պուտինը, հրամայելով հարձակվել Ուկրաինայի վրա, որոշել է սասանել ազատ աշխարհի հիմքերը՝ մտածելով, որ կստիպի իրեն խոնհարվել իր սպառնալիքների առաջ։ Բայց նա չարաչար սխալվել է։
Բայդենը բարձր է գնահատել ինչպես ուկրաինացի ժողովրդի խիզախությունը, նաեւ ագրեսիայի դիմաց Արևմուտքի համախմբվածությունը։
«Այո, մենք՝ Միացյալ Նահանգները, ուկրաինացի ժողովրդի հետ ենք».- նշել է ԱՄՆ նախագահը։
Բայդենն ասել է, որ Պուտինը պատասխան կտա իր գործողությունների համար։
«Մեր պատմության ընթացքում մենք այս դասը քաղեցինք. երբ բռնապետերը չեն վճարում իրենց ագրեսիայի գինը, դա ավելի շատ քաոս է առաջացնում»: – ընդգծել է Բայդենը: Նա Ռուսաստանի գործողություններն անվանել է «Պուտինի պատերազմ», որը, ըստ նրա, միտումնավոր է և ոչ հրահրված։
Բայդենը նաև հայտարարել է, որ ԱՄՆ-ը, հետևելով ԵՄ երկրներին և Կանադային, փակում է իր օդային տարածքը ռուսական օդանավերի համար։ Նա խոստացել է օգնություն ցուցաբերել Ուկրաինային: Բայդենը նաեւ կրկնել է, որ ԱՄՆ զինվորականները չեն մասնակցի Ուկրաինայի մարտերին, սակայն ասել է, որ պատրաստ են պաշտպանել ՆԱՏՕ-ի դաշնակիցների տարածքի «ամեն թիզը»։
Բայդենը խոսել է նաև Ռուսաստանի դեմ պատժամիջոցների մասին.
«Մենք կտրեցինք Ռուսաստանի մուտքը բարձր տեխնոլոգիաներ, դա կթուլացնի նրանց բանակը տարիներ շարունակ»։ ԱՄՆ նախագահը հաստատել է նաեւ ռուս օլիգարխների ունեցվածքի ծագումը հետաքննող միջազգային հատուկ խմբի ստեղծումը։
«Պուտինի պատերազմն Ուկրաինայում Ռուսաստանին կդարձնի ավելի թույլ, իսկ մնացած աշխարհը՝ ավելի ուժեղ: Մենք տեսնում ենք միացյալ Եվրոպա և միացյալ Արևմուտք: Ժողովրդավարությունները դիմագրավում են մարտահրավերը: Սա փորձություն է, դրա համար ժամանակ կպահանջվի: Բայց Պուտինը երբեք չի խախտի ազատ աշխարհի վճռականությունը»,- եզրափակել է Բայդենը։
