Ուկրաինայի տարբեր շրջաններում չեն դադարում կատաղի մարտերը ուկրաինական զորքերի և երկիր ներխուժած ռուսական բանակի միջև։ Մարտեր են ընթանում՝ Կիևի, Խարկովի, Դոնեցկի, Չեռնիգովի, Սումիի շրջաններում, Խերսոնի շրջանում։
Մի շարք բնակավայրերի վրա օդային հարվածներ են գրանցվել: Տուժել է, մասնավորապես, Կիևի շրջանի Բորոդյանկա գյուղը։ Հաղորդվում է նաեւ, որ ռուսական օդանավերը գրոհել են Չեռնիգովը, վնասվել են բնակելի թաղամասեր և այլ քաղաքացիական օբյեկտներ, մասնավորապես՝ թիվ 18 դպրոցը։ Առնվազն 33 մարդ մահացել է, տասնյակ մարդիկ վնասվածքներով հոսպիտալացվել են։
Երեկ երեկոյան հրետակոծվել է Զապորոժյեի ատոմակայանը, հրդեհվել է ուսումնական շենքը, ռեակտորները չեն տուժել.
Ուկրաինայի արտաքին գործերի նախարար Դմիտրի Կուլեբան հայտարարել է, որ ատոմակայանի վթարի դեպքում հետեւանքները կարող են լինել 10 անգամ ավելի վատ, քան Չեռնոբիլի աղետը, և պահանջել է անհապաղ հրադադար հաստատել ատոմակայանի տարածքում։
Գիշերը Կիևում հզոր պայթյուն է որոտացել: Քաղաքում քիչ մարդ է մնացել:
ՄԱԿ-ը հայտնել է, որ ավելի քան մեկ միլիոն փախստական է լքել Ուկրաինան ռուսական ներխուժման սկզբից:
Ռուսաստանի և Ուկրաինայի պատվիրակությունների միջև բանակցություններ են տեղի ունեցել Բելառուսի տարածքում։ Պայմանավորվածություն է ձեռք բերվել փախստականների համար մարդասիրական միջանցքների ստեղծման և նոր հանդիպման մասին։
Սպիտակ տան մամուլի քարտուղար Ջեն Փսակին հայտարարել է, որ ԱՄՆ նախագահ Ջո Բայդենը մտադիր չէ կապ հաստատել Վլադիմիր Պուտինի հետ։
«Հիմա նման բանակցությունների ժամանակը չէ»,- ասել է խոսնակը։