Սահմանադրական դատարանը 5 օր շարունակվող քննարկումներից հետո այսօր ավարտեց ընտրությունների արդյունքները վիճարկելու մասին ընդդիմադիր մի քանի ուժերի դիմումների քննարկումը։ Դատարանը գնաց խորհրդակցությունների սենյակ՝ գործով որոշում կայացնելու։
«Սահմանադրական դատարանի մասին օրենքի 57-րդ հոդվածի 3-րդ մասի համաձայն՝ կողմերի եզրափակիչ ելույթներից հետո նախագահողը հայտարարում է գործի քննության ավարտի մասին։ Դատարանը հեռանում է խորհրդակցությունների սենյակ՝ գործով որոշում կայացնելու համար։ Որոշման հրապարակման օրվա և ժամի մասին նախօրոք կտեղեկացվեք»,- հայտարարեց ՍԴ նախագահ Արման Դիլանյանը։
Հիշեցնենք, որ չորս քաղաքական ուժ՝ «Հայաստան» ու «Պատիվ ունեմ» դաշինքները, նաև «Հայոց Հայրենիք» կուսակցությունն ու «Զարթոնք» դաշինքն դիմել էին Սահմանադրական դատարան` Ազգային ժողովի արտահերթ ընտրությունների արդյունքները անվավեր ճանաչելու, կամ ընտրությունների արդյունքները անվավեր ճանաչելու և մանդատների բաշխման կարգը սահմանելու, կամ էլ ընտրությունների երկրորդ փուլ նշանակելու պահանջով։
