Իտալական «Ինտեր»-ի և Հայաստանի ֆուտբոլի ազգային թիմի նախկին կիսապաշտպան Հենրիխ Մխիթարյանը մեծ ցանկություն ունի մասնակցելու Չեմպիոնների լիգայի եզրափակչին: Այս մասին հայ կիսապաշտպանն ասել է իտալական լրատվամիջոցներին։
«Ամեն ինչ անելու եմ այդ եզրափակիչին մասնակցելու համար: Ցանկություն ունեմ հաղթելու այդ խաղում, քանի որ կարիերաս մոտենում է ավարտին, և կուզենայի հաղթել Չեմպիոնների լիգայում»,-ասել է Մխիթարյանը:
Հայ կիսապաշտպանի խոսքով` Չեմպիոնների լիգայի եզրափակիչի մրցակից «Մանչեսթեր Սիթի»-ն եվրոպական ակումբների շարքում ունի լավագույն կազմերից մեկը:
««Մանչեսթեր Սիթին» աշխարհի լավագույն թիմերից է, որն ունի հիանալի կիսապաշտպանություն, սակայն ուժեղ են նաև մեր կիսապաշտպանները, որոնք գիտեն՝ ինչպես խլել գնդակն ու գրոհ սկսել: Վերջիվերջո մենք պետք է հասնենք նպատակին ու հաղթենք այս խաղում: Չեմպիոնների լիգայի եզրափակիչները ամեն օր չեն լինում, գիտենք, որ բարդ խաղ է սպասվում, սակայն պատրաստ ենք ընդունել այս մրցավազքը, որպեսզի հասնենք հաղթանակի»,- նշել է Մխիթարյանը։
«Մանչեսթեր Սիթի»-ի դեմ սպասվող խաղից առաջ Մխիթարյանը վերականգնվում է ձախ ազդրի մկանային վնասվածքից: Մխիթարյանը վնասվածքը ստացել էր Չեմպիոնների լիգայի «Միլան»-ի դեմ կիսաեզրափակիչի պատասխան խաղում և փոխարինվել էր խաղի 44-րդ րոպեին:
