Շիրակի մարզպետարանի աջակցությամբ, Շիրակի տուրիզմի զարգացման և հետազոտության կենտրոնի հետ համատեղ ջանքերով, փետրվարի 26-ին Մեծ Սարիար բնակավայրի անտառային հատվածում տեղի կունենա ամենամյա «Շիրակի ձմեռ» փառատոնը։
Շիրակի մարզպետի տեղակալ Կարեն Մանուկյանն ու Շիրակի տուրիզմի զարգացման և հետազոտության կենտրոնի համակարգող Նաիրա Գրիգորյանը այսօր ներկայացրել են միջոցառման մանրամասները։
Մարզպետի տեղակալ Կարեն Մանուկյանը՝ կարևորելով մարզում ձմեռային տուրիզմի զարգացումը նշել է, որ արդեն ավանդույթ է դարձել մարզում «Շիրակի ձմեռ» փառատոնի անցկացումը տարբեր համայնքներում, որի նպատակը մարզի բնակչության ակտիվ հանգիստը և հետաքրքիր ժամանցն ապահովելն է։
Միջոցառումը բաղկացած է լինելու սպորտային, ժամանցային, մշակութային հատվածներից, անցկացվելու են դահուկավազքի, բազկամարտի, պարանի ձգման, հրաձգության մրցումներ, լինելու է համերգային հետաքրքիր ծրագիր։